Friday 17 September 2010

ოკუპაციის 200 წელი (13 სექტემბრის ტაბულადან)

საქართველოს სკოლებში - ალბათ მომავალი წლიდან - მასწავლებლები შეძლებენ გამოიყენონ დამხმარე სახელმძღვანელო „ოკუპაციის 200 წელი“
პირველად როცა გავიგე ამ ჯერ არარსებული წიგნის შესახებ, ძალიან შემეშინდა, რომ გამოვიდოდა პრიმიტიული აგიტპროპი, თავისი შეთქმულების თეორიებით და ქართველობის გაბუქებით.
მერე მივხვდი - შეიძლება ეს ერთ-ერთი ყველაზე მნიშვნელოვანი წიგნი იყოს. და არა მარტო მოწაფეებისათვის.
რატომ?
თუ თქვენ თვლით, ვერაგმა რუსეთმა უდრეკი ქართველი ხალხი მიიერთა, მაგრამ ვერ დაიმონა, და 200 წელი ჩვენ ყველა გმირულად ვიბრძოდით თავისუფლებისათვის, და სრულად შევინარჩუნეთ ჩვენი კულტურა, ენა, სარწმუნოება, მთლიანობა, მაშინ ზღაპრების მომყოლი გჭირდებათ, და წიგნი არც დაიწეროს, უკეთესია.
თუ გინდათ გაიგოთ, როგორ გავფარჩაკდით, დავკარგეთ ბევრი რამ, შევიძინეთ რაღაც, უფრო სიმახინჯე, ვიდრე სილამაზე, მაინც გადავრჩით, და ეხლა ხელახლა უნდა საკუთარი თავი შევქმნათ, და აგერ ლექსიც ამაზე:

ჩვენისთანა ბედნიერი
განა არის სადმე ერი?
მძიმე ყალნით,
ლამაზ ფალნით
მორთული და მშვენიერი;
უწყინარი,
უჩივარი,
ქედდრეკილი, მადლიერი;
უშფოთველი,
ქვემძრომელი,
რიგიანი, წესიერი;
ყოვლად მთმენი,
ვით ჯორ-ცხენი,
ნახედნი და ღონიერი.
ჩვენისთანა ბედნიერი
განა არის სადმე ერი?!
ყველა უნჯი,
ყველა მუნჯი,
გულჩვილი და ლმობიერი;
თვალაბმული,
თავაკრული,
პირს ლაგამი ზომიერი;
ყველა ყრუი,
ყველა ცრუი,
ჭკვადამჯდარი, გულხმიერი;
მცირე, დიდი -
ყველა ფლიდი,
ცუღლუტი და მანკიერი.
ჩვენისთანა ბედნიერი
განა არის სადმე ერი?!
მტვერწაყრილი,
თავდახრილი,
ყოვლად უქმი, უდიერი;
უზღუდონი,
გზამრუდონი,
არგამტანი და ცბიერი;
მტრის არმცნობი,
მოყვრის მგმობი,
გარეთ მხდალი, შინ ძლიერი;
არრის მქონე,
არრის მცოდნე,
უზრუნველი და მშიერი.
ჩვენისთანა ბედნიერი
კიდევ არის სადმე ერი?

მაშინ სულ სხვანაირი წიგნი გჭირდებათ.
როგორი წიგნი მინდა მე? მე მინდა, რომ ამ წიგნმა:
• დაგვანახოს საქართველო და რუსეთი მსოფლიო ისტორიის ორასწლიან კონტექსტში
• მოყვეს ქართულ კოლაბორაციონიზმზე
• გვაჩვენოს ჩვენში ისეთი საბჭოთა ფენომენების წარმოშობა, როგორიცაა ინტელიგენცია, ორმაგი მორალი და ვითომ თანაბარი, მაგრამ ღრმად სტრატიფიცირებულ საზოგადოება: ვერა-ვაკე vs სოფლელები
• ახსნას, რატომ იყვნენ სტალინი და ბერია საბჭოთა არაკაცები, და არა საამაყო ქართველები
• განიხილოს, როგორ გავხდით კანონიერ ქურდების ქვეყანა და რა იყო ქართული საბჭოთა მილიცია
• გაანალიზოს, როგორ იხრწნებოდა საქართველოს ეკონომიკა და როგორ იყო კორუფცია მოსკოვში ამის ნაწილი
• დაგვაფიქროს, რატომ უნდოდათ მეოცე საუკუნის დასაწყისში გელათელ ბერებს და აკაკი წერეთელს ქართველების კათოლიკობაში გადასვლა
• მოყვეს, თუ როგორ დაბეჩავდა ქართული სოფელი
• გაგვახსენოს, როგორ გაჩდნენ ქართველი თერგდალეული ლიბერალები
• გვასწავლოს, ვინ იყო დიმიტრი ყიფიანი
• გვკითხოს, თუ რა ტრადიციაა მართლაც ქართული, და რა არის საბჭოთა წარმონაქმნი
• აღადგინოს 1832 წლის ამბები
• აღწეროს, რატომა გვაქვს ესეთი საზღვრები?
• აღადგინოს ზუსტად ომი რუსეთთან 08.08.08
• კითხვა დაგვისვას ასეთი რა იცოდა რუსეთმა/ბოლშევიკების პარტიამ, ჩვენ რომ კისერი მოგვიგრიხა?
• და სხვა მრავალი რამ
თქვენი არ ვიცი და მე არ მაწყენდა ასეთი წიგნის წაკითხვა
.

4 comments:

  1. და ვიცით ვინ არიან წიგნის ავტორები?

    ReplyDelete
  2. VI DAIOTE NEREALNIE PLANI

    http://www.youtube.com/watch?v=sY29bozmFuI&feature=related

    ReplyDelete
  3. მივესალმები ასეთ წიგნს მაგრამ არა ისეთს ერთი და ორი კაცი რომ დაჯდება და საკუთარი ინტერპრეტაციით ჩამოწერს მოვლენებს... არც ისეთი როგორსაც ჩვენ საქართველოს ისტორიას გვასწავლიდნენ... მე არ მჭირდება არც წლები და ფაქტები, არ მჭირდება ვინ როდის რამდენი გმირობა ჩაიდინა, ვინ სად რა ქნა... ისტორიაში თარიღების დამახსოვრებაზე დიდი სისულელე არაფერი მიმაჩნდა მეხუთე კლასშიც კი... არ მომწონდა ისტორიის სახელმძღვანელოები იმიტომ რომ მხოლოდ საზეპირო რაღაცეები იყო... არადა გვჭირდებოდა და გვჭირდება ისეთი სახელმძღვანმელოები რომლებიც მოვლენების შედეგებს დაგვიხატავს...თუ ეს წიგნი ტრაფარეტული ისტრია არ იქნება თუ ამ წიგნით მე მივიღებ პასუხს იმაზე თუ რატომაა ჩემი წინა თაობის მენტალიტეტი ასეთი დამყაყებული და მჟავე...რამ მოკლა ამ ხალხში სახელმწიფოებრიობის გრძობა...რატომ ფიქრობს ჩემი 35+ ნაცნობების უმეტესობა რომ სულერთია საქართველო იქნება თუ არა სახელმწიფო, ხომ ვიყავით საბჭოთა კავშირში ცუდად ვიყავით თუ რა...რატომ დაიწია ერის ინტელექტმა ასე დაბლა...მე ამ კითხვებზე და არამარტო ამათზე მჭირდება პასუხი და ჩემ შვილებს ალბათ უფრო დასჭირდებათ...
    მინდა ასეთი წიგნი...
    ასე უფრო უკეთეს ქართველებად გავზრდი ჩემ შვილებს და ასე უფრო უკეთესი ქართველი ვიქნები...

    ReplyDelete
  4. სულმოუთმენლად ველი წიგნს

    ReplyDelete